Кедейлердің мәртебесі!

Біз пендешілікпен кейде біреуге түрі, тұрмысына қарап баға беріп жатамыз. Осы бағамыз: «Бұл адамның тұрмыстың жағдайы мәз емес екен»,-деген тұжырыммен шектелсе мейлі еді-ау! Арамызда біреуді кедейлігі себебінен адам санатынан шығарып тастайтындар да баршылық!

Негізі, көп жағдайда пенденің бағасы, мына пәнидің ақиқатына сай, жалған болып жатады!

Ал ақиқатында кедейлер:

- пайғамбарлардың сүйіспеншілігіне бөленген жандар.

- жәннатқа ең алдымен кіретін солар.

- жәннаттың басым көпшілігі болатында солар.

Имам Бухари (рохматуллаһи ғаләйһи) Ибн Аббастан (родиял-лаһу ғанһу) риуаят еткен хадисте, Пайғамбарымыз (солләл-лаһу ғаләйһи уә салләм): «Мен жәннаттың ішін көріп, ондағының басым көпшілігі кедей болғандар екенін көрдім»,-деген.

Бұл – барлығымыз кедей болайық деген сөз емес! Бұл жердегі мәселе – адамға тұрмыстық жағдайына қарап «жақсы-жаман» баға бермеу!

Толығырақ ...

Дүниедегі ең қымбат нығмет!

Алла Тағала «Ғофир» сүресінің 28-ші аятында былай деген: «Рас, Алла Тағала шектен шығушы, жалғаншыларды тура жолға салмайды».

Дүниеде бір нығмет бар. Оның құнын мал-дүниемен өлшеу мүмкін емес. Ол – Алла Тағаланың һидаяты. Яғни, тура жол табу.

Һидаят – дұрыстық, бағыттау.

Шариғатта «һидаят» деп «Алла Тағалаға иман келтіру, әрі соған сай амал ету» деп айтылады.

Хақ Тағала жәннатты һидаят нәсіп болғандар үшін жаратты.

Жәннат – пенде иман келтіріп, соған сай амал еткеннің сауабы.

Сауап – игі амалдың сыйы, өтемі.

Әрбір нәрсенің нәтижесі әрекетке байланысты. Демек, һидаятқа қол жеткіземін деген пенде соған сай әрекет етуі тиіс. Ал әрекет ниеттен бастау алады. Қазақтың: «Жақсы пейіл, жарым ырыс»,-деген сөзі осының бейнесі. Ырыстың екінші жартысы пенденің амалымен байланысты. Бұны «қалай еркі» деп айтады. Хақ Тағала осы «қалай еркін» пенденің үлесі еткен. Яғни, пенде қаласа, сауапты амал істейді, қаламаса, істемейді. Міне, осы жағдай Хақ Тағала әділдігінің бейнесі! Алла Тағалаға әділетсіздікке бармайды, әрі иманды пендесін мәңгі тозақы, ал кәпірді мәңгі жәннатты етпейді. Құранда бұл мәселеге қатысты: «Раббың пенделеріне зұлымдық етпейді»,-деген. («Фуссилат», 46 аят)

Демек, һидаятқа кол жеткізу – пенденің қолында. Сондықтан біреу мына пәниде адасып, Ақыретте соның зардабын шегіп жатса, өзінен, өз ниеті мен ісінен көрсін.

Ақиқат! Алла Тағала ниеті бұрыс, тура жолды іздемеген, сауапқа ұмтылмаған пендесіне һидаятын нәсіп етпейді.

Ислам – арзан, өтпей қалған заттар дүкені емес! Пасықтық, залымдық, күпірлік – һидаятқа түбегейлі теріс сипаттар. Сондықтан Алла Тағала осы сипаттарға ие пендесін тура жолға бастамайды. Яғни, дүниедегі ең қымбат сыйын нәсіп етпейді!

Толығырақ ...

Біз сондай болып кеттік...

Жайнамазы біреу ғана, бірақ сәждесі мың болған үммет едік. Бүгін жайнамазы мың, бірақ сәждесі бір болған үмметке айналдық.

Көп оқу себебінен Құран кітаптарын тоздырып жіберетін үммет едік. Бүгін Құранды үй әшекейіне айналдырған үммет болдық.

Сауапты істе жарысатын үммет едік. Бүгін күнә істеуде жарысатын үмметке айналдық.

Дүниені билесекте, керілмеген үммет едік. Бүгін болмашы нәрсеге қол жеткізсек өзгелерді танымайтын үммет болдық.

Әйелзат өзін көрсетпейтін, ұялғанын көрсететін үммет едік. Бүгін өзін көрсетіп, ұятты ұмытқан үмметке айналдық.

Пайғамбарымыз (солләл-лаһу ғаләйһи уә салләм) әйелзаттың көңілін жақсы, жылы сөзбен көтеретін еді. Біз бүгін әйелге қол көтеретін үммет болдық.

Пайғамбарымыз (солләл-лаһу ғаләйһи уә салләм) кейде үш күн қатарынан қарны ашып жүретін. Біз бүгін күніне бес рет тамақтанатын үммет болдық.

Түні бойы намаз оқу себебінен Пайғамбарымыздың (солләл-лаһу ғаләйһи уә салләм) аяқтары ісіп кететін. Біз бүгін ұйқыдан көзіміз ісіп кететін үммет болдық.

Толығырақ ...

Ислам әйелді қалай құтметтеді?

1. Алла Тағала әйелзатты «ана» ретінде құрметтеуді бұйырып: «Біз адам баласына ата-ананы құрметтеуді бұйырдық»,-деді. («Ахқаф», 15 аят)

2. Пайғамбарымыз (солләл-лаһу ғаләйһи уә салләм): «Жәннат – аналардың табанының астында»,-деді.

3. Пайғамбарымыз (солләл-лаһу ғаләйһи уә салләм) әйелдерге тек жақсылық істеуді бұйырды. (Бухари)

4. Пайғамбарымыз (солләл-лаһу ғаләйһи уә салләм) қыз балаға қамқорлық еткен адаммен жәннатта бірге боламын деді. (Муслим)

5. Пайғамбарымыз (солләл-лаһу ғаләйһи уә салләм) анасы дүниеден өткен адамға, анасының әпке-қарындасымен қатынасты үзбеуді бұйырды. (Бухари)

Толығырақ ...

Күнәнің мысалы!

Бірінші мысал: кейде денеде пайда болған ісіктің бір ғана емі болады. Оны жарып, сылып, немесе кесіп алып тастау керек. Бұдан басқа емі болмайды. Егер ісіктен дер кезінде құтылмаса, ол басқа ауруды пайда етуі мүмкін. Күнә да сол тәрізді. Кез келген әрекет ниеттен бастау алады. Ал ниеттің орны – жүрек. Сондықтан күнәнің бірден-бір емі – оны жүректен алып тастау керек!

Әрекет жүректен бастау алатыны жайында Пайғамбарымыз (солләл-лаһу ғаләйһи уә салләм) имам Муслим (рохматуллаһи ғаләйһи) Әбу Һурайрадан (родиял-лаһу ғанһу) риуаят еткен хадисте айтқан.

Екінші мысал: күнә от шоғына ұқсайды. Саналы адам отқа жоламайды, әрі шоқты үстіне тигізбейді. Өйткені шоқ денесін күйдіріп, киімінде із қалдыратынын біледі. Тіпті, бір шоқтың себебінен от пайда болуы мүмкін. Күнә да шоқ тәрізді, пенденің жүрегіне дақ түсіреді, болмаса күнәһарлыққа тартып кетеді.

Үшінші мысал: күнә жұқпалы ауруға ұқсайды. Жұқпалы вирустың  аз-көбі болмайды. Адам ауырып калу үшін бір вирустың өзі жеткілікті. Мысал ретінде тымауды айтса болады. Күнә да сол тәрізді! Күнәнің үлкен, кішісі болмайды. Пенде кіші, не болмаса үлкен күнә істесін, қандай болғандада, күнә істеген болады. Бұл мәселеге қатысты ғалымдарымыз: «Күнәнің үлкен-кішілігіне қарама, оны кімге қарсы келіп істеп жатқаныңа қара»,-деген.

Төртінші мысал: күнә шаянға ұқсайды. Адам баласы шаянға, ол кішкентай, немесе үлкен шаян болсын, жоламайды. Себебі қандай болғандада, шаянның шаққаны қауіпті. Күнә да сол тәрізді! Күнәнің қандай түрі болмасын, пенде үшін қауіпті.

Алла Тағала күнәнің баршасынан пәк болуымызды нәсіп етсін! Әмин!

Толығырақ ...

Абыройдың үлесі!

Бір бойжеткен келін болып түседі. Бір ай өткеннен соң енесі келініні: «Бақытты бол қызым! Баламның намаз оқуына себепкер болдың! Мен отыз жыл бойы істей алмағанымды, сен отыз күнде істедің. Бақытты бол!»,-деп, қуанғанынан көзіне жас алды.

Сонда келіні былай деді: «Апа! Мен сізге бір қысса айтып берейін. Бір күні таудан түскен бір үлкен тас жолды жауып қояды. Бір адам қайласын алып келіп, тасты ұрып сындыруға әрекет етеді. Тасты 99 рет ұрады. Бірақ тас сынбайды. Сол кезде бір жолаушы келіп қаладыда: «Не істеп жатырсың?»,-деп сұрайды.

- Мына тасты жолдан алып тастау керек. Маған көмектесіп жібер!

Жолаушы қайланы алып бір ұрғанда, тас бөлшек-бөлшек болып қалады. Қараса, тастың астында алтын толған әмиян жатыр. Оны көріп, екеуі таласып қалады.

Жолаушы: - Бұл тасты мен сындырдым. Әмиян менікі – дейді.

Қайланың иесі: - Жоқ! Сен соңында келдің. Мен бұл тасты 99 рет ұрмасам, ол сынбас еді – дейді.

Осылайша қайла иесі мен жолаушы ұзақ уақыт бойы айтысып, бір шешімге келе алмай, істі қазиге ұсынуды жөн көреді.

Қази істің мән жайын тыңдағаннан соң қайла иесіне: - Сіз тасты 99 рет ұрған екенсіз, сізге алтынның 99 бөлігі болсын – деп, жолаушыға: - Сіз тасты бір рет ұрған екенсіз, сізге алтынның бір бөлігі болсын – деп үкім шығарады».

Расындада, қайла иесі тасты 99 рет ұрмаса, тас жолаушының бір ұрғанынан бөлінер ме еді?

Отыз жыл бойы анасының сөзіне құлақ аспаған баласы, келіннің себебінен 30 күннің ішінде намазға жығылды. Келіннің көркеммінезділігі мен көргендігін қараңыз! Ол даналықпен баланың намазға жығылғанын өз ісі деп білмей, ананың қамы мен бейнеті бекер болмағанына ишара етті.

Өмір осындай! Кейде біреудің бейнетін, атағы мен абыройын басқа біреу иеленіп жатады. Бұны ғимараттың іргетасымен салыстырса болады. Іргетас болмаса, дуал тұрмайды. Бірақ бұл жайында көп адам ойланбастан, бар назарын дуалдың соңғы қышын қойған адам салады.

Әрбір амал ниетке қарай есепке алынатынын ұмытпайық! Әрбір пенденің игі істегі үлесі ықыласына байланысты. Әрбір істің шын бағасы мен ақиқат нәтижесі Қияметте анық болады!

Бүгінгі күні бізде тұрмысқа шыққан қызға: «Барған жеріңде бақытты бол!»,-деп тілек айту үрдісі қалыптасқан. Бұл – өте дұрыс тілек! Дегенмен, ілгеріде қазақ тұрмыс құрып жатқан қызына: «Барған жеріңді бақытты ет!»,-депте бата берген.

Сөз соңыда тілеріміз: қыздарымыз барған жерін бақытты ететін көркеммінез иесі болсын! Ықылас болса, әркім Ақыретте өз үлесіне қол жеткізеді! Алла Тағала баршамыздың қайырлы үлесіміз мол болуын жазсын! Әмин!

Толығырақ ...