Ынсап қажет!

Біреу досына барып есігін ұрды. Досы шығып: «Қош келдің! Не қызмет?»,-деп сұрады.

- Маған қарызға ақша керек.

Досы үндеместен үйіне кіріп, ол сұраған ақшаны алып шықты.

Содан соң ақша берген досы үйіне кіріп күйініп көзіне жас алды. Оны көрген әйелі: «Неге сонша күйіндіңіз? Қарыз бергеніңізге ме?»,-деп сұрады.

- Жоқ, оған күйінбедім! Досыма қарыз берегеніме емес, оның жағдайынан бейхабар болғаныма күйінемін...

Қанша қысылып тұрсада, қарыз сұрамайтын адамдар бар. Сондай-ақ басқалай лажы жоқтықтан қарыз сұрауға мәжбүр болатындар бар. Солардың ішінде өзіміздің бауыр, діндес, көршілеріміз баршылық.

Алла Тағала баршамызға ынсапты болуымызды жазсын! Әмин!

Толығырақ ...

Намаз!

Намаз – Алла Тағаланың әмірі, мұсылманның парызы.

Пенде намазда ықыласты болса:

- жүрегі нұрланады.

- жүзі ажарланады.

- көкірек көзі ашылады.

- ғұмыры ұзарады.

- санасы жетіледі.

- ақылы толысады.

- несібесі молаяды.

- денесі қуаттанады.

- жолы ашылады.

- мінезі көркееді.

- жағымсыз істен аулақ болады.

- жамандықтан аман болады.

- Жаратушының разылығына лайық болады.

Толығырақ ...

Бүгін тапқан қазынам!

Перзентке: «Бұл айыпты іс! Біреу көрсе ұят болады!»,-дегеннен гөрі: «Былай істеме, күнә болады! Бұл іс Алла Тағаланың қаһарын келтіреді! Керісінше, былай істесең сауап болады!»,-деп үйреткен абзал. Осылай тәрбиеленген бала Алла Тағала пенденің барлық ісін қадағалайтынын жастайынан ұғынады.

-

Әрбір пенде дүниенің емес, игі ниеттің қамын жеуі тиіс. Себебі әрбір іс ниетке қарай ескеріліп, сауап ниетке қарай беріледі.

-

Біреуге сүйіспеншілігі жайында айтып, кейін көңілі өзгеде болған – жалғаншы. Ақырет жайында айтып, бірақ көңілі дүниеде болған – жалғаншы.

-

Жетпіс жыл бойы Қағба мен мақам Ибраһимнің арасында Алла Тағалаға құлшылық еткен, әрі залымды жақсы көрген пенде, Қияметте жәһаннамға сол залыммен бірге түседі. (Ибн Масғуд)

-

Әйелзат бар инабаттылық үшін жыртықты тігіп киетін, әрі әйелзат бар жалаңаштану үшін бүтінді жыртып киетін.

-

Мәжнүнді – әйелге, Қарунды – дүниеге, ал Перғауынды атақ пен мансапқа болған махаббаттары жалмады. Сахабалар Алла Тағалаға деген сүйіспеншілігі себепті дін жолында жан тапсырды. Өлмес пенде жоқ! Мәселе, өлім мәнді болуында!

Толығырақ ...

Кедейлердің мәртебесі!

Біз пендешілікпен кейде біреуге түрі, тұрмысына қарап баға беріп жатамыз. Осы бағамыз: «Бұл адамның тұрмыстың жағдайы мәз емес екен»,-деген тұжырыммен шектелсе мейлі еді-ау! Арамызда біреуді кедейлігі себебінен адам санатынан шығарып тастайтындар да баршылық!

Негізі, көп жағдайда пенденің бағасы, мына пәнидің ақиқатына сай, жалған болып жатады!

Ал ақиқатында кедейлер:

- пайғамбарлардың сүйіспеншілігіне бөленген жандар.

- жәннатқа ең алдымен кіретін солар.

- жәннаттың басым көпшілігі болатында солар.

Имам Бухари (рохматуллаһи ғаләйһи) Ибн Аббастан (родиял-лаһу ғанһу) риуаят еткен хадисте, Пайғамбарымыз (солләл-лаһу ғаләйһи уә салләм): «Мен жәннаттың ішін көріп, ондағының басым көпшілігі кедей болғандар екенін көрдім»,-деген.

Бұл – барлығымыз кедей болайық деген сөз емес! Бұл жердегі мәселе – адамға тұрмыстық жағдайына қарап «жақсы-жаман» баға бермеу!

Толығырақ ...

Дүниедегі ең қымбат нығмет!

Алла Тағала «Ғофир» сүресінің 28-ші аятында былай деген: «Рас, Алла Тағала шектен шығушы, жалғаншыларды тура жолға салмайды».

Дүниеде бір нығмет бар. Оның құнын мал-дүниемен өлшеу мүмкін емес. Ол – Алла Тағаланың һидаяты. Яғни, тура жол табу.

Һидаят – дұрыстық, бағыттау.

Шариғатта «һидаят» деп «Алла Тағалаға иман келтіру, әрі соған сай амал ету» деп айтылады.

Хақ Тағала жәннатты һидаят нәсіп болғандар үшін жаратты.

Жәннат – пенде иман келтіріп, соған сай амал еткеннің сауабы.

Сауап – игі амалдың сыйы, өтемі.

Әрбір нәрсенің нәтижесі әрекетке байланысты. Демек, һидаятқа қол жеткіземін деген пенде соған сай әрекет етуі тиіс. Ал әрекет ниеттен бастау алады. Қазақтың: «Жақсы пейіл, жарым ырыс»,-деген сөзі осының бейнесі. Ырыстың екінші жартысы пенденің амалымен байланысты. Бұны «қалай еркі» деп айтады. Хақ Тағала осы «қалай еркін» пенденің үлесі еткен. Яғни, пенде қаласа, сауапты амал істейді, қаламаса, істемейді. Міне, осы жағдай Хақ Тағала әділдігінің бейнесі! Алла Тағалаға әділетсіздікке бармайды, әрі иманды пендесін мәңгі тозақы, ал кәпірді мәңгі жәннатты етпейді. Құранда бұл мәселеге қатысты: «Раббың пенделеріне зұлымдық етпейді»,-деген. («Фуссилат», 46 аят)

Демек, һидаятқа кол жеткізу – пенденің қолында. Сондықтан біреу мына пәниде адасып, Ақыретте соның зардабын шегіп жатса, өзінен, өз ниеті мен ісінен көрсін.

Ақиқат! Алла Тағала ниеті бұрыс, тура жолды іздемеген, сауапқа ұмтылмаған пендесіне һидаятын нәсіп етпейді.

Ислам – арзан, өтпей қалған заттар дүкені емес! Пасықтық, залымдық, күпірлік – һидаятқа түбегейлі теріс сипаттар. Сондықтан Алла Тағала осы сипаттарға ие пендесін тура жолға бастамайды. Яғни, дүниедегі ең қымбат сыйын нәсіп етпейді!

Толығырақ ...

Біз сондай болып кеттік...

Жайнамазы біреу ғана, бірақ сәждесі мың болған үммет едік. Бүгін жайнамазы мың, бірақ сәждесі бір болған үмметке айналдық.

Көп оқу себебінен Құран кітаптарын тоздырып жіберетін үммет едік. Бүгін Құранды үй әшекейіне айналдырған үммет болдық.

Сауапты істе жарысатын үммет едік. Бүгін күнә істеуде жарысатын үмметке айналдық.

Дүниені билесекте, керілмеген үммет едік. Бүгін болмашы нәрсеге қол жеткізсек өзгелерді танымайтын үммет болдық.

Әйелзат өзін көрсетпейтін, ұялғанын көрсететін үммет едік. Бүгін өзін көрсетіп, ұятты ұмытқан үмметке айналдық.

Пайғамбарымыз (солләл-лаһу ғаләйһи уә салләм) әйелзаттың көңілін жақсы, жылы сөзбен көтеретін еді. Біз бүгін әйелге қол көтеретін үммет болдық.

Пайғамбарымыз (солләл-лаһу ғаләйһи уә салләм) кейде үш күн қатарынан қарны ашып жүретін. Біз бүгін күніне бес рет тамақтанатын үммет болдық.

Түні бойы намаз оқу себебінен Пайғамбарымыздың (солләл-лаһу ғаләйһи уә салләм) аяқтары ісіп кететін. Біз бүгін ұйқыдан көзіміз ісіп кететін үммет болдық.

Толығырақ ...